Rèflèksi Dino Kartini

Kartini’s

Mbok menawa akèh para kaum wanita kang wis lali marang anané dina Kartini, apa menèh marang labuh lan labeté sarta perjuangané kanggo ngangkat derajat wanita sakdrajat karo pria. Pancèné émansipasi wanita wis bisa, snajan mbaka saka sithik, mbukak peluang kanggo para wanita mbuktèkaké kabisané yèn ora kalah karo kaum pria.

Wanita pranyata ora mung sakderma dadi kanca wingking thok. Yèn ing jaman mbiyèn panggonané wanita mung ana ing kasur, dapur lan sumur, ing sakmengko kahanan wis luwih maju. Ing jaman kemajuan ngéné wis akèh para wanita kang bisa nggayuh panggonan kang strategis ana ing madyaning papréntahan, kayata dadi mentri, gubernur, bupati, camat nganti tekan lurah. Kemajuan lan kesetaraan pria lan wanita pranyata wis bisa nggawa kemajuan.

Nanging sing kadhangkala ndadèkaké prihatin, tuntutan kemajuan kuwi mau ana sing kebablasen lan ora empan papan. Ora sithik wanita kang merga tuntutan karir njur nglalèkaké jejibahané ing rumah tangga, malah ana sakpérangan wanita kang ngingkari kodraté dhéwé minangka pihak sing paling dominan anggoné nglairaké, ndidhik lan nggulawentah anak, khususé ana ing lingkungan ngomah.

Ora mung kuwi, ing jaman kang sakabèhé diukur nganggo materialisme, bandha, drajat, lan dhuwit, ora sithik wanita kang ngalalaké kabèh cara kanggo nggayuh kamulyan donya. Ing jaman saiki, akèh para prawan kang lila dirabi karo Om-om mung merga ngincer bandhané. Si Om-om kang modhal raja brana kuwi mau, nggunakaké kesugihané kanggo mikut atiné wanita.

Bebasan crita cinta modhal dhengkul, cinta ditolak dukun bertindak. Ing jaman mbiyèn dukun kuwi modhal menyan kanggo ngguna-guna utawa melet wong, ananging saiki wis kalah canggih karo “menyan jepang”. Kang dimaksud “menyan jepang” ora liya kayata honda, susuki, isusu, toyota lan liya-liyané( iki vèrsi tembangé Kang Sony Joss). Ning kuwi mau mung sakpérangan sithik lho…….ora teges kena digebyah uyah tumrapé kabèh kaum wanita.[]